काठमाडौँ । पूर्व प्रधानमन्त्री तथा नेकपा एमालेका अध्यक्ष केपी शर्मा ओली पक्राउ परेपछि एमाले कार्यकर्तामा भावनात्मक प्रतिक्रिया देखिएको छ। “पहिले संसद जल्यो, त्यसपछि गोली चल्यो” भन्ने चुनावी नाराबाट प्रभावित कार्यकर्ताहरू अहिले रुवावासीमा उत्रिएका छन् भने देशभर मिश्रित प्रतिक्रिया देखिन थालेको छ।
भदौ २३ र २४ गते भएको ‘जेनजी’ आन्दोलनका क्रममा भएको मानवीय तथा भौतिक क्षतिको छानबिनका लागि गठित गौरीबहादुर कार्की नेतृत्वको आयोगले दिएको प्रतिवेदनका आधारमा सरकारले पहिलो दिनमै कडा निर्णय लिँदै ओलीलाई पक्राउ गरेको हो। सोही प्रकरणमा पूर्व गृहमन्त्री रमेश लेखक समेत प्रहरी नियन्त्रणमा छन्।
नयाँ जनादेशसहित सत्तामा आएको बालेन शाह नेतृत्वको सरकारले मन्त्रिपरिषद्को पहिलो बैठकबाटै आयोगको सिफारिस कार्यान्वयन गर्ने निर्णय गर्दै तत्काल एक्सनमा उत्रिएको हो। यस कदमलाई सरकारको दृढता र कानुनी शासनप्रतिको प्रतिबद्धताका रूपमा व्याख्या गरिएको छ।
ओली पक्राउसँगै एमाले कार्यकर्ताहरू भावुक बन्दै सडकमा उत्रिएका छन्। कतिपय स्थानमा विरोध प्रदर्शन भएका छन् भने धेरै कार्यकर्ताले निष्पक्ष छानबिन हुनुपर्ने माग अघि सारेका छन्।
यद्यपि, समाजका विभिन्न तहबाट सरकारको निर्णयलाई सकारात्मक रूपमा पनि लिइएको छ। कानुनको दायरामा सबै बराबर हुने सन्देश यस घटनाले दिएको भन्दै नागरिक स्तरबाट समर्थनसमेत देखिएको छ।
राजनीतिक विश्लेषकहरूका अनुसार यो घटनाले नेपालमा उत्तरदायित्व र विधिको शासन स्थापित गर्ने दिशामा महत्वपूर्ण संकेत गरेको छ। अबको प्रक्रियाले न्यायिक निष्पक्षता कायम राख्न सक्ने कि नसक्ने भन्नेमा सबैको ध्यान केन्द्रित भएको छ।
Discussion about this post