बेलडाँडी । ‘बैतडीका बाघ’ उपनामले परिचित राष्ट्रिय स्वतन्त्र पार्टी (रास्वपा) का सांसद हरिमोहन भण्डारी कञ्चनपुरको बेलडाँडी आइपुगेका छन्।
रास्वपाले सञ्चालन गरिरहेको ‘हामी आउँदै छौँ’ अभियानअन्तर्गत कञ्चनपुरको जिम्मेवारी पाएका भण्डारीसहितका नेताहरूलाई बेलडाँडीमा पार्टीका नेता तथा कार्यकर्ताले भव्य स्वागत गरेका छन्।
बैतडीबाट प्रतिनिधिसभा सदस्यमा निर्वाचित भण्डारीको बेलडाँडी आगमनलाई स्थानीय रास्वपा पंक्तिले संगठन विस्तार, जनसम्पर्क र नागरिकसँग प्रत्यक्ष संवादलाई थप प्रभावकारी बनाउने अवसरका रूपमा लिएको छ।
भण्डारीको राजनीतिक यात्रा लामो र विविध अनुभवले भरिएको छ। उनले २०३५ सालदेखि राजनीतिमा चासो राख्दै आएको उल्लेख गरेका छन्। राष्ट्रिय प्रजातन्त्र पार्टीबाट राजनीतिक यात्रा सुरु गरेका उनी २०५६ सालमा नेपाली कांग्रेसको सक्रिय राजनीतिमा प्रवेश गरेका थिए।
कांग्रेसमा रहेर विभिन्न जिम्मेवारी सम्हालेका भण्डारीले प्रदेशसभा निर्वाचनमा पटक-पटक प्रतिस्पर्धा गरेका थिए। त्यसपछि २०७९ सालमा स्वतन्त्र उम्मेदवारका रूपमा चुनाव लडेका उनी पछि रास्वपामा आबद्ध भए। २०८२ सालको प्रतिनिधिसभा निर्वाचनमा बैतडीबाट २२ हजार १३४ मत प्राप्त गर्दै निर्वाचित भएका थिए।
राजनीतिसँगै सुदूरपश्चिमको मौलिक संस्कृति, विशेषगरी गौरा पर्वलाई काठमाडौंमा प्रवर्द्धन गर्न सक्रिय रहनुले पनि भण्डारीलाई सार्वजनिक वृत्तमा परिचित बनाएको छ।
रास्वपाले असोज २० गतेदेखि सुरु गरेको ‘हामी आउँदै छौँ’ अभियानको मुख्य उद्देश्य पार्टी संगठन विस्तार गर्नु, स्थानीय नागरिकसँग प्रत्यक्ष संवाद बढाउनु तथा जनताका समस्या, आवश्यकता र सुझाव संकलन गर्नु रहेको छ।
अभियानअन्तर्गत सांसद तथा पार्टीका केन्द्रीय सदस्यहरूलाई विभिन्न जिल्लाको जिम्मेवारी दिइएको छ।
यसै क्रममा कञ्चनपुरको जिम्मेवारी पाएका भण्डारीको बेलडाँडी आगमनले स्थानीय राजनीतिक वृत्तमा चासो बढाएको छ।
अभियानमार्फत नागरिकका समस्या बुझ्ने, विकास निर्माणका सवालमा छलफल गर्ने र स्थानीय जनअपेक्षालाई पार्टीको आगामी कार्ययोजनासँग जोड्ने अपेक्षा गरिएको रास्वपा बेलडाँडीका सभापति तेज सिंह धामीले जानकारी दिए।
बेलडाँडीमा भएको स्वागतले रास्वपाको स्थानीय संगठनमा उत्साह थपेको देखिए पनि अभियानको वास्तविक प्रभाव भने नागरिकका समस्या सुन्ने र तिनको सम्बोधनका लागि कस्तो पहल गरिन्छ भन्ने विषयले निर्धारण गर्नेछ।
अब भण्डारीको नेतृत्वमा कञ्चनपुरमा सञ्चालन हुने अभियानले पार्टी संगठनलाई कत्तिको सक्रिय बनाउँछ र स्थानीय जनताका अपेक्षालाई व्यवहारमा उतार्न कस्तो भूमिका खेल्छ भन्ने चासो बढेको छ।
Discussion about this post