एमाले निकट किसान महासंघले तिलकेनीमा मनायो धान दिवस

महेन्द्रनगर । नेकपा एमालेको जनसंगठन अखिल नेपाल किसान महासंघ कञ्चनपुरले धान दिवस मनाएको छ ।

शुक्रवार महासंघको कञ्चनपुर जिल्ला कमिटीले भीमदत्त नगरपालिका–१० तिलकेनीमा रोपाइँ गरी धान दिवस मनाएको हो ।

महासंघका जिल्ला अध्यक्ष रामबहादुर बुढाको अध्यक्षतामा भएको धान रोपाइँ कार्यक्रममा नेकपा एमालेका पोलिटब्युरो सदस्य तथा कञ्चनपुर जिल्ला इन्चार्ज नारदमुनि राना प्रमुख अतिथि रहेका थिए ।

कार्यक्रममा एमालेका केन्द्रीय सदस्य तथा पूर्व सांसद नरबहादुर धामी विशिष्ट अतिथि थिए । कार्यक्रममा एमाले कञ्चनपुरका सचिव पल्लबराज भट्ट र उपसचिव कर्णबहादुर चन्द समेतले सहभागिता जनाएका थिए । रोपाइँमा किसान महासंघका नेता, कार्यकर्ताको सहभागिता थियो ।

एमाले नेताहरूले रोपाइँ खेतमै पुगेर धान रोपेर धान दिवस मनाएका छन् । धानको उत्पादन बढाउने उद्देश्यले सरकारी र गैरसरकारीस्तरबाट असार १५ गतेका दिन देशभर धान दिवस मनाइएको छ ।