बर्षासंगै भीमदत्त नगरमा ग्राभिलको माग ह्वातै बढ्यो

कञ्चनपुर– बर्षातसंगै कञ्चनपुरको भीमदत्त नगरपालिकामा ग्राभिलको माग ह्वातै बढेको छ । बर्षातले कच्ची सडकमा पानी भरिभराउ हुन थालेपछि सडक बिग्रीएका भत्किएका बनाउनका लागि माग ह्वातै बढेको हो ।

भीमदत्त नगरका मेयर पदम बोगटीका प्रेस संयोजक चक्र महताले १९वटै वडाबाट ग्राभिलको माग आईरहेकोे बताए । ‘जसो जसो बर्षा हुन्छ, त्यसो त्यसो गाँउमा ग्राभिलको माग गरिरहेको छ, ‘उनले भने, ‘नदीखोला नाला बन्दले हामीलाई सास्ती भईरहेको छ ।’

बर्षाले सडकमा पानी भरिनुका साथै खाल्टाखुल्टी पुर्नका लागि आवश्यक ग्राभिल ल्याउनका लागि सहजिकरण गरिदिन प्रशासनसंग पालिकाले अनुरोध गरेको प्रेस संयोजक महताले बताए ।

‘हामी जहाँ आवश्यक हुन्छ, स्थानीय जनताकै माग अनुरुप त्यहाँ ग्राभिल हाल्न खोज्छौँ, एमाले कार्यकर्ता त्यही पुगेर अवरोध गर्दछ, ‘उनले भने, ‘एमाले अवरोधकै कारण ग्राभिल हाल्ने काम समेत प्रभावित भईरहेको छ ।’ भीनपा ५बनखेत सडकमा ग्राभिल हाल्ने क्रममा एमालेले अवरोध गरेपछि प्रशासनले पालिकालाई रोकेको बताउँदै उनले अब खुलाउनका लागि प्रशासनलाई पत्राचार गरेको बताए ।

विकासमा राजनीति गर्न नहुने उनको सुझाव छ । ‘हामी ग्राभिल ल्याएर खाने होईन, अहिले बर्षातको मौषम भएकाले जनताकै माग र आवश्यकता अनुरुप हाल्ने हौँ, ‘उनले भने, ‘विपद्लाई मध्य नजर गर्दै सबैले आ–आफ्नो ठाँउबाट आवश्यक सहजिकरण गर्नुपर्छ ।’ नगरका जनताको माग अनुरुप आफुहरुले कामकाज गर्दै आएको प्रेस सल्लाहकार महताले बताए ।