आफुलाई इन्डियन हिरो सिंघम सम्झने प्रहरी निरीक्षक बिष्ट फेरि विवादित

महेन्द्रनगर, ११ भाद्र । भीमदत्त नगरपालिका–१० जिमुवामा रहेको शिद्धनाथ माध्यामिक विद्यालयमा भएको घटना र प्रहरीको भुमिकाका विषयले अहिले देशव्यापी चर्चा पाएको छ ।

विद्यालयका लेखापाल विरेन्द्रप्रसाद जोशीले एक छात्रालाई दुर्व्यवहार गरेको भन्दै भाद्र ३ गते विद्यालय तनावग्रस्त बनेको थियो । तनाव बढेर स्थानीय प्रहरी चौकीले सम्हाल्न नसकेपछि जिल्ला प्रहरी कार्यालयले इन्स्पेक्टर सिताराम बिष्टको नेतृत्वमा प्रहरी टोली पठायो ।

आफुलाई इन्डियन फिल्मको सिंघम हिरो सम्झिने बिष्टले कार्यकक्षमैं गएर लेखापाल जोशीलाई हतकडी लगाइ लछार्दै आक्रोसित भिडभएको बाटो हुदै विद्यालयभन्दा २ सय मिटर टाढा राखिएको प्रहरी भ्यानसम्म जोशीलाई लछार्दै हिँडाउदै लगियो, बीचैमा आक्रोशित भीडले जोशीमाथि आक्रमण शुरु ग¥यो, तर आफुलाई सिंघम सम्झिने प्रहरी निरीक्षक बिष्ट र उनको टोली मूकदर्शक बन्यो, मरणासन्न हुने गरी जोशी कुटिए तर सिंगम र उनको टोलीले आफ्नो जिम्मेवारीमा ध्यान दिन सकेनन् ।

दोषीमाथी छानविन भइ कार्वाही हुनुपर्ने आम नागरिकको धारण छ । दोषीमाथी छानविन भई कार्वाही हुनुपर्ने मागसहित एक हप्ताभन्दा लामो समय देखि शिद्धनाथ माध्यामिक विद्यालय बन्द छ । हिजो आइतबारबाट कञ्चनपुरका शिक्षकहरु अनिश्चितकालिन शिक्षण संस्था बन्दको कार्यक्रमका साथ सडकमा ओर्लिएका छन् ।

यस अघि गत जेठ २ गते भीमदत्त नगरपालिका–५ सुकासालमा पत्रकारमाथि कुटपिट र दुर्व्यवहार गरेको आरोपमा उनी कार्वाहीमा परेका थिए । त्यति बेला उनलाई सचेत गराइएको थियो । डोटी सरुवा भइसकेका बिष्टले अफुलाई खुबै होसियार सम्झिदै कञ्चनपुरमा दोस्रो पटक कम्जोरी गरेको आम नागरिकको बुझाइ छ । सरुवाको रमाना मात्रै लिन बाँकी रहेकै बेला उनी फेरि विवादमा तानिएका छन् । उनलाई कार्वाहीको माग राख्दै आज जिल्ला भरिका शैक्षिक संस्था बन्द रहेका छन् ।

इन्स्पेक्टर बिष्टमाथि कार्वाहीको माग उठे पनि अहिलेसम्म प्रशासनले केही गरेको छैन । ‘कार्वाही नगरे त आन्दोलन फिर्ता नै हुँदैन’ नेपाल शिक्षक संघका एक पदाधिकारीले भने, ‘प्रहरीकै मिलेमतोमा जोशी मरणासन्न कुटिएको प्रष्ट छ ।’ भीमदत्त नगरपालिका–३ नौलाखेतका स्थानिय समेत रहेका बिष्ट आफ्नै गृहनगरमा पटक–पटक विवादमा आएका छन् ।