बेलडाँडीको कालिकिच उपभोक्ता समितिको छैटौं कार्यकालमा भीम बहादुर थापा सर्वसम्मत अध्यक्ष चयन

बेलडाँडी, १७ माघ– शुक्लाफाँटा राष्ट्रिय निकुञ्जको मध्यवर्ती क्षेत्र कालिकिच उपभोक्ता समितिको छैटौं कार्यकालका लागि अध्यक्षको रूपमा भीम बहादुर थापा सर्वसम्मत चयन भएका छन् । थापा, जो २०५६ सालको प्रस्तावित मध्यवर्ती समितिको अध्यक्ष देखि लगातार समितिको अध्यक्षको रूपमा कार्यरत छन् । संरक्षण कार्यमा गरेको अतुलनीय योगदानका कारण हरेक कार्यकालमा सर्वसम्मत चयन हुदै आएका छन् ।

थापाको नेतृत्वमा समितिले निकुञ्ज र स्थानीय समुदाय बीच समन्वय, संरक्षण, र दिगो विकासको मार्गमा महत्त्वपूर्ण कदम चाल्दै आएको छ । थापा ५ कार्यकाल सर्वसम्मत र १ कार्यकाल चुनावबाट निर्वाचित भएका थिए । उनले संरक्षणका क्षेत्रमा पुर्याएको योगदानले उनलाई स्थानीय समुदाय र समितिका सदस्यहरूबाट विश्वास प्राप्त भएको छ ।

नयाँ कार्यकालका लागि समितिको उपाध्यक्षमा भागरथी शाही, सचिवमा वीर बहादुर वडवाल, कोषाध्यक्षमा मदन राज भट्ट चयन भएका छन् । सदस्यहरूमा मनोज बोहरा, सक्रराम साउद, भागरथी ऐर, ईश्वरी भट्ट, रतना विक, कालु सिंह बिष्ट, तौला राना, लक्ष्मी लुहार र तारा धामी चयन भएको समितिका सचिव वीर बहादुर बडुवालले जानकारी गराउनु भयो ।

थापाले यस कार्यकालको शुरुवातमा भने, “हामी निकुञ्जको जैविक विविधता र पारिस्थितिकीको संरक्षणमा ध्यान दिन्छौं, र त्यस्तै स्थानीय समुदायका जीवनस्तर र आवश्यकताहरूलाई पनि अनिवार्य रूपमा ध्यानमा राख्नेछौं । हामीले दुवै पक्षलाई सशक्त र सहयोगी बनाउने योजनामा काम गर्नेछौं भन्दै सबैप्रति आभार प्रकट गरेका थिए ।“ आफ्नो नेतृत्वमा निकुञ्जको संरक्षण र स्थानीय समुदायको समृद्धिका लागि दुई पक्षलाई समान प्राथमिकता दिने प्रतिबद्धता व्यक्त गरेका छन् ।

समितिको मुख्य उद्देश्य भनेको निकुञ्ज प्रशासन र स्थानीय समुदाय बीचको सशक्त सेतुको भूमिका निर्वाह गर्नु हो। यसले दुवै पक्षका चासो र आवश्यकताहरूलाई सँगै समेटेर, पारदर्शिता र सहकार्यको माध्यमबाट प्रबन्धन कार्यहरूमा सुधार ल्याउने काम गर्दछ ।

समितिले जैविक विविधता र पारिस्थितिकीको संरक्षणमा अत्यधिक ध्यान पुर्याउने छ, साथै स्थानीय समुदायलाई प्राकृतिक स्रोतहरूको दिगो उपयोग र संरक्षणमा सक्रिय साझेदार बनाउन प्रोत्साहित गर्नेछ ।

यसका अतिरिक्त, समितिले निकुञ्ज र स्थानीय समुदाय बीच सन्तुलन कायम राख्दै, आपतकालीन स्थितिहरू जस्तै आगलागी, विपत्ति, वा महामारीको समयमा राहत र पुनर्निर्माण कार्यमा पनि समन्वय गर्नेछ ।

समितिले संरक्षण र समुदायको समृद्धिका बीच सन्तुलन कायम राख्ने प्रयास गर्नेछ । यसका लागि, स्थानीय समुदायको आवाजलाई महत्वपूर्ण स्थान दिँदै, उनीहरूको हक र अधिकारको रक्षा गर्नेछ । यसले स्थानीय समुदायलाई संरक्षणका योजनामा सशक्त बनाउँछ र उनीहरूको सक्रिय सहभागिता सुनिश्चित गर्नेछ ।