स्थानीय तहको निर्वाचन चैत ५ गतेसम्म गर्न आयोगको सुझाव

बेलडाँडी । निर्वाचन आयोगले आगामी चैत ५ गतेभित्र स्थानीय तहको निर्वाचन गराउन सरकारलाई सुझाव दिएको छ। राजनीतिक दलहरूसँगको परामर्श र आफ्नो तयारीका आधारमा आयोगले चैत ५ गते निर्वाचन गराउन सकिने निष्कर्षसहित सरकारसमक्ष मिति प्रस्ताव गरेको हो।

निर्वाचन आयोगका प्रवक्ता नारायण भट्टराईका अनुसार सबै राजनीतिक दलबाट प्राप्त सुझाव र आयोगको तयारीलाई मध्यनजर गर्दा चैत ५ गते निर्वाचन गराउन कुनै समस्या छैन। आयोगले यस विषयमा सरकारलाई जानकारी गराइसकेको छ।

प्रवक्ता भट्टराईले चैत ५ गते नै निर्वाचन गराउँदा पनि कुनै समस्या नहुने स्पष्ट पार्दै अब सरकारले उपयुक्त मिति घोषणा गर्ने बताए। उनका अनुसार सरकार पनि स्थानीय तहको निर्वाचन गराउने विषयमा सकारात्मक देखिएको छ।

सरकारसँग निर्वाचनको विषयमा एक चरण छलफल भइसकेको छ। प्रधानमन्त्रीका सल्लाहकारहरूका अनुसार निर्वाचनको मिति घोषणा गर्ने तयारी भइरहेको छ। प्रधानमन्त्रीको भारत भ्रमणअघि नै निर्वाचनको मिति घोषणा हुन सक्ने उनीहरूको भनाइ छ।

प्रधानमन्त्रीकी प्रेस संयोजक दीपा दाहालले पनि स्थानीय तहको निर्वाचनबारे छलफल भइरहेको तर मिति भने टुङ्गो लाग्न बाँकी रहेको बताएकी छन्। उनका अनुसार निर्वाचनको मिति चाँडै तय हुनेछ।

यसअघि २०७९ वैशाखमा स्थानीय तहको निर्वाचन भएको थियो। निर्वाचित जनप्रतिनिधिको पाँचवर्षे कार्यकाल समाप्त हुनुअघि नै नयाँ निर्वाचन गराउनुपर्ने संवैधानिक व्यवस्थालाई ध्यानमा राख्दै निर्वाचन आयोगले चैत ५ गतेलाई उपयुक्त मानेको हो।

अब सरकारले निर्वाचन आयोगको सुझावअनुसार मिति घोषणा गरेसँगै स्थानीय तहको आगामी निर्वाचनको प्रक्रिया थप स्पष्ट हुने अपेक्षा गरिएको छ।

यो खबर पढेर तपाईलाई कस्तो महसुस भयो ?
Array

Discussion about this post

छुटाउनु भयो कि ?

Related Posts

लोकप्रिय
भर्खरै प्रकाशित