बेदकोटको मध्यवर्ती उपभोक्ता समितिको मनपरीविरुद्ध स्थानीयको विरोध

बेदकोट, कञ्चनपुर – बेदकोट नगरपालिकामा १० मा रहेको मध्यवर्ती उपभोक्ता समिति द्वारा उपभोक्ता समूह गठनमा मनपरी गरिएको भन्दै स्थानीय बासिन्दा तथा उपभोक्ता समूहहरूले कडा विरोध जनाएका छन् । शनिबार बिहान समितिको कार्यालयमा पुगेरै उनीहरुले विरोध गरेका थिए ।

स्थानीयहरूले शुक्लाफाँटा राष्ट्रिय निकुञ्ज संरक्षण तथा वन्यजन्तु संरक्षणका लागि गठन गरिने समितिमा केही निश्चित व्यक्तिलाई मात्र समावेश गरी अन्य समुदायलाई बेवास्ता गरिएको आरोप लगाएका छन्। उनीहरूले समितिले आफ्ना स्वार्थअनुकूल व्यक्तिहरूलाई मात्रै चयन गरेको भन्दै असन्तुष्टि व्यक्त गरेका थिए ।

विरोध कार्यक्रममा विभिन्न उपभोक्ता समूहका प्रतिनिधिहरू, स्थानीय बुद्धिजीवी, समाजसेवी तथा अन्य सरोकारवालाहरूको उपस्थिति थियो। उनीहरूले उपभोक्ता समूह निर्माण गर्दा सबै क्षेत्रका प्रतिनिधित्व हुने गरी खुला प्रक्रिया अपनाइनुपर्ने माग राखेका छन् ।

विरोध कार्यक्रममा सहभागी स्थानिय तथा भगवती र सरस्वती समुहबाट प्रतिनिधि छनौट गर्दा सुटुक्क गरेको बताए । स्थानीय माया रावलले भने “निकुञ्जको संरक्षण हाम्रो जिम्मेवारी हो, तर उपभोक्ता समूह बनाउँदा स्थानीय जनतालाई नै उपेक्षा गर्नु अन्यायपूर्ण हो। सबै समुदायलाई समेट्ने गरी समिति पुनर्गठन गरिनुपर्छ।“

२ कार्यकाल समितिको अध्यक्ष भई सकेका निर्वतमान अध्यक्ष अर्जुन कठायतले त्यस्तो भएको भए निर्वाचन स्थगित गर्ने बताएका छन् । उनले यस्तो नभएको दाबी गर्दै भएको भए सच्याएर अघि बढ्ने बताएका छन् ।

विरोधपछि स्थानीयहरूले उपभोक्ता समूह गठन प्रक्रिया पुनरावलोकन गर्न माग गर्दै सम्बन्धित निकायको ध्यानाकर्षण गराएका छन् । उनीहरूले आफ्ना माग पूरा नभए थप संघर्षका कार्यक्रम घोषणा गर्ने चेतावनीसमेत दिएका छन्।