कञ्चनपुर । कञ्चनपुरको भीमदत्त नगरपालिका–महेन्द्रनगरमा शुक्रबारदेखि ‘फारवेष्टर्न टुरिज्म मार्ट’ सुरु हुन लागेको छ । सुदूरपश्चिम प्रदेशका ऐतिहासिक, धार्मिक र प्राकृतिक पर्यटकीय गन्तव्यको प्रवर्धन र प्रचारप्रसार गर्ने उद्देश्यले नेपाल पर्यटन बोर्ड र भीमदत्त नगरपालिकाको संयुक्त आयोजनामा तीन दिने पर्यटन महोत्सव सुरु गरिएको हो।
मार्टमा नेपाल र भारतका पर्यटन व्यवसायीबीच पर्यटन प्रवर्द्धनका सम्भावना र चुनौतीबारे छलफल हुनेछ। भारतका दिल्ली, उत्तराखण्ड, उत्तर प्रदेशलगायतका शहरका व्यवसायीलाई नेपालका प्रमुख पर्यटकीय गन्तव्यबारे विस्तृत जानकारी दिइनेछ।
कार्यक्रमको उद्घाटन पर्यटन तथा नागरिक उड्डयन मन्त्री बन्द्री पाण्डेले नगर प्रमुख पदम बोगटीको अध्यक्षतामा महेन्द्रनगरस्थित होटल ओपेरामा गरेका हुन्। आयोजकका अनुसार दोस्रो दिन महाकाली र कर्णाली नदीमा ट्याफ्टिङ, टीकापुर र शुक्लाफाँटा निकुञ्ज लगायतका स्थलको अवलोकन गराइनेछ भने तेस्रो दिन समिक्षात्मक छलफलसहित समापन गरिनेछ।
टुर एण्ड ट्राभल एजेन्ट संघ (नाटा) सुदूरपश्चिम अध्यक्ष पदम विक्रम सिंहले भारत–नेपालबीचको पर्यटन सम्बन्ध विस्तार भई आर्थिक विकासमा टेवा पुग्ने विश्वास व्यक्त गरे। वरिष्ठ पत्रकार चित्राङ्ग थापाले कार्यक्रमबाट आपसी सम्वाद र सहयोग बढ्ने बताए। स्थानीय होटल व्यवसायीले पनि अतिथ्य सेवामार्फत पर्यटक आकर्षणमा जोड दिनुपर्नेमा जोड दिएका छन्।
तीन दिने यो महोत्सवले सुदूरपश्चिम क्षेत्रलाई अन्तर्राष्ट्रिय पर्यटन नक्शामा स्थापित गर्न सहयोग पुग्ने अपेक्षा गरिएको छ।
Discussion about this post