काठमाडौं । जेनजी आन्दोलनको आगलागीले थिलोथिलो बनेको राष्ट्रपति कार्यालय शीतलनिवास अझै बस्न नमिल्ने अवस्थामा छ । यही कारण सोमबार नवनियुक्त तीन मन्त्रीहरूको शपथ कार्यक्रम भवनभित्र नभई बाहिरै पाल टाँगेर सम्पन्न भएको छ ।
प्रधानमन्त्री सुशीला कार्कीको उपस्थितिमा राष्ट्रपति रामचन्द्र पौडेलले मन्त्रीहरूलाई शपथ खुवाएका हुन् । यसअघि गत शुक्रबार प्रधानमन्त्री कार्कीको शपथ भने राष्ट्रपति निवासभित्रै गरिएको थियो । सोमबारको कार्यक्रममा सरकारी निकायका प्रमुखदेखि कूटनीतिक नियोगका प्रतिनिधिसम्म सहभागी थिए ।
शपथग्रहणबाट नयाँ जिम्मेवारी पाएका मन्त्रीहरूमा – रामेश्वर खनाल (अर्थमन्त्री), कुलमान घिसिङ (ऊर्जा, भौतिक योजना तथा सहरी विकासमन्त्री) , ओमप्रकाश अर्याल (गृह तथा कानुनमन्त्री) रहेका छन् ।
विशेषगरी घिसिङलाई तीन मन्त्रालय, र अर्याललाई दुई मन्त्रालयको जिम्मेवारी दिइनु नवनियुक्त सरकारलाई ठूलो चुनौती र अवसर दुवैको संकेतका रूपमा हेरिएको छ ।
जेनजी आन्दोलनपछिको असामान्य परिस्थितिमा खण्डहर कार्यालय बाहिर टाँगिएको पालमुनि भएको यो शपथ देशको नयाँ राजनीतिक यात्राको प्रतीक बनेको छ ।
Discussion about this post