काठमाडौँ । परराष्ट्रमन्त्री शिशिर खनालको नेतृत्वमा नेपालले असंलग्न आन्दोलन (नाम) को उच्चस्तरीय स्मरणसभा (हाईलेभल कमेमोरेटिभ मिटिङ) मा सहभागिता जनाउने भएको छ।
सर्बियाको राजधानी बेलग्रेडमा भदौ १५ र १६ गते आयोजना हुने उक्त उच्चस्तरीय स्मरणसभामा परराष्ट्रमन्त्री खनालको नेतृत्वमा तीन सदस्यीय नेपाली प्रतिनिधिमण्डल सहभागी हुनेछ। मन्त्रिपरिषद्ले साउन २६ गते उक्त प्रतिनिधिमण्डललाई सहभागिताका लागि स्वीकृति दिने निर्णय गरेको थियो।
सन् १९६१ मा बेलग्रेडमै असंलग्न आन्दोलनको पहिलो शिखर सम्मेलन आयोजना भएको थियो। सोही पहिलो सम्मेलनको ६५औँ वार्षिकोत्सवका अवसरमा यस वर्ष बेलग्रेडमा उच्चस्तरीय स्मरणसभा आयोजना गर्न लागिएको हो।
परराष्ट्र मन्त्रालयका अनुसार स्मरणसभामा सहभागी हुन मन्त्री खनाल भदौ १४ गते साँझ सर्बिया प्रस्थान गर्नेछन्। उनी भदौ १७ गते सर्बियाबाट नेपाल फर्कने कार्यक्रम रहेको उनको सचिवालयले जनाएको छ।
उक्त कार्यक्रममा विश्वका विभिन्न मुलुकका नेताहरू, प्रतिनिधिमण्डलहरू तथा असंलग्न आन्दोलनमा आबद्ध राष्ट्रका प्रतिनिधिहरूको सहभागिता रहनेछ।
नेपालले आफ्नो परराष्ट्र नीतिको आधारस्तम्भका रूपमा असंलग्नताको सिद्धान्तलाई अंगीकार गर्दै आएको छ। असंलग्न आन्दोलनप्रतिको नेपालको प्रतिबद्धतालाई नेपालको संविधानले समेत प्रमुख नीतिका रूपमा स्वीकार गरेको छ।
नेपालले असंलग्न आन्दोलनको वाङडुङ सम्मेलनदेखि शिखर सम्मेलन, मन्त्रीस्तरीय बैठक तथा अन्य विभिन्न बैठकहरूमा उच्चस्तरीय सहभागिता जनाउँदै आएको छ। साथै, नेपालले असंलग्न आन्दोलनमा निरन्तर रचनात्मक र सक्रिय भूमिका निर्वाह गर्दै आएको छ।
Discussion about this post