बेलडाँडीमा विपदको समयमा तुरुन्त प्रतिकार्यका लागि व्यापारीहरुसंग छलफल

बेलडाँडी,
बेलडाँडीमा विपदको समयमा तुरुन्त प्रतिकार्यका लागि व्यापारीहरुसंग निड्स नेपालले छलफल कार्यक्रम सम्पन्न गरेको छ ।

स्थानीय बजारमा दाल,चामल, सावुन र सेल्टर सामग्रीको उपलब्धताको अवस्था सम्वन्धी पालिका र आपुर्तीकर्ता संग निड्स नेपालले एकदिने छलफल कार्यक्रम पालिकाको सभाहलमा सम्पन्न गरेको निड्स नेपाल बेलडाँडीकी सहजकर्ता जानकी शाहीले जानकारी गराउनु भयो ।

उहाँका अनुसार विपद जतिबेला पनि निम्तन सक्ने भएकाले हुने क्षतिलाई न्युनिकरण गर्नका लागि स्थानीय वजारमा उपलब्ध हुने समग्रीका विषयमा छलफल भएको बताए ।

विपदको समयमा तुरुन्त प्रतिकार्यका लागि स्थानीय व्यापारीहरुले दाल,चामल, सावुन, सेल्टर लगायत अति आवश्यक सामग्रीहरु छलफलमा उपलब्ध गराउन सकिने जनाएका छन् ।

विपद जोेखिम क्षेत्रमा आवश्यक पहल गरि उक्त क्षेत्रमा बसोबास गर्ने समुदायलाई सुरक्षित स्थानमा स्थानान्तरण गर्न उपयुक्त स्थानको खोजी र उनीहरूको सुरक्षाको लागि सचेतना कार्यक्रम सञ्चालन गरी सम्भाव्य जोखिम कम गर्न सकिने छलफल भएको थियो । सहभागीहरूले विपदको समयमा आवश्यक पर्ने महत्त्वपूर्ण औजारहरू तयारी हालतमा राख्नुपर्ने पालिकालाई सुझाव समेत दिएका थिए ।

बेलडाँडी गाउँपालिका प्रमुख हरिशचन्द्र रानाको प्रमुख आतिथ्यतामा, बेलडाँडीका व्यापारी, विभिन्न संघ संस्थाका प्रतिनिधी, पालिका उपाध्यक्ष, जनप्रतिनिधी, कर्मचारीहरुको सहभागितामा सम्पन्न भएको कार्यक्रममा निड्स नेपालका विपद कोडिनेटर ईश्वर उपाध्याय र मनराज उपाध्यायले सहजिकरण गरेका थिए ।