दिगो वन कार्यविधिमा घूसकाण्ड : सुदूरपश्चिम प्रदेश सरकारको मन्त्रालयमा अख्तियारको छापा

कैलाली । सुदूरपश्चिम प्रदेश सरकारको उद्योग, पर्यटन, वन तथा वातावरण मन्त्रालयमा अख्तियार दुरुपयोग अनुसन्धान आयोगले छापा मारेको छ । बुधबार अख्तियारको टोलीले मन्त्रालयमा छापा हानेर महत्त्वपूर्ण कागजातहरू नियन्त्रणमा लिएको मन्त्रालयका सूचना अधिकारी भोजराज पाठकले पुष्टि गरेका छन् ।

प्रदेश मन्त्रिपरिषद् बैठकबाट दिगो वन व्यवस्थापन कार्यविधि पारित गर्ने तयारी भइरहेका बेला कार्यविधि निर्माण र पारित गराउने क्रममा ठूलो आर्थिक चलखेल भएको अडियो सार्वजनिक भएपछि अख्तियारले छापा मारेको हो ।

उक्त अडियोमा उद्योग, पर्यटन, वन तथा वातावरणमन्त्री लक्ष्मणकिशोर चौधरीको संलग्नता देखिएपछि उनले पदबाट राजीनामा दिइसकेका छन् । अडियोअनुसार मन्त्री चौधरी, सचिवालयका केही कर्मचारी र वन माफियाबीच आर्थिक लेनदेन भएको संकेत गरिएको छ ।