विकास र समृद्धिका लागि सूर्यमा मतदान गर्न एमालेको आह्वान

महेन्द्रनगर,

नेकपा एमाले कञ्चनपुरले विकास र समृद्धिका लागि सूर्यमा मतदान गर्न सबै मतदातामा आह्वान गरेको छ ।

जिल्ला निर्वाचन परिचालन कमिटीका संयोजक लक्ष्मी बुढाले बिहीवार प्रेस विज्ञप्ति जारी गर्दै अहिले गठबन्धनका नाममा चरम स्वार्थी समूह राज्यशक्तिको दुरुपयोगमा सक्रिय रहेको जनाएकी छन् ।

‘केही अवाञ्छित शक्तिहरूका प्रतिगामी उद्देश्य र राजनीतिक व्यक्तिहरूको ईश्याले विकास निर्माण र समृद्धि तर्फको यात्रामा गम्भीर अवरोध उत्पन्न भएको छ,’ विज्ञप्तिमा उल्लेख छ, ‘विसंगति, बेथिति र अस्थिरताका पुराना दूषित खेलको फेरि पुनरावृत्ति भएको छ । परमादेशी आदेशले अराजकताको विकृत उत्पादनको रूपमा जन्माइएको कर्तव्य, लक्ष्य तथा गन्तव्यहीन कार्यपालिका अकर्मण्य मात्रै होइन, भ्रष्टाचारमा निर्लिप्त छ ।’

गठबन्धन सत्ता शक्तिको अनुचित भागबण्डा, लेनदेन र राज्यस्रोतको दोहनमा केन्द्रित रहेको विज्ञप्तिमा उल्लेख छ । ‘यतिखेर मुलुक आर्थिक संकटको गम्भीर मोडमा छ । दक्षिणपन्थी र स्वार्थी गठबन्धनले प्रहार गरिरहेको अवस्थामा राष्ट्रियता, स्वाधीनता र अखण्डतामाथि नै खतरा उत्पन्न भएको छ । बाह्य शक्तिको इशारामा नागरिकता विधेयक ल्याउनेदेखि विदेशीलाई खुशी पार्न विभिन्न आयोजना सुम्पिने काम भएको छ,’ विज्ञप्तिमा छ ।

निर्वाचनमा लोकतन्त्र, संघीयता, राष्ट्रिय स्वाधिनता र अखण्डताको रक्षाका साथै विकास र समृद्धिका लागि नेकपा एमालेलाई मतदान गर्न आग्रह गरिएको छ ।

‘२०७९ मंसिर ४ गते सम्पन्न हुने प्रतिनिधिसभा र प्रदेशसभा सदस्य निर्वाचन देशको भविष्य निर्धारण गर्ने गहन विषयको जनमत संग्रह हुने भएकाले निर्वाचनमा प्रकट हुने जनादेश छलि, स्वार्थी र जनहित विरोधी प्रतिगामी गठबन्धन कि ताजा जनादेशमार्फत लोकतान्त्रिक विधिद्वारा सामाजिक सुव्यवस्था र विकासका लागि शासन सञ्चालन गर्न चाहने हाम्रो पार्टी जस्तो अग्रगामी शक्ति ? कसलाई रोज्ने भन्ने मूल विषय भएकाले मंसिर ४ गते सम्पन्न हुन गइरहेको प्रतिनिधिसभा र प्रदेशसभा सदस्य निर्वाचनमा लोकतन्त्र, संघीयता, राष्ट्रिय स्वाधिनता र अखण्डताको रक्षाका साथै विकास र समृद्धिका लागि नेकपा एमाले कञ्चनपुर र राष्ट्रिय प्रजातन्त्र पार्टी कञ्चनपुरका बीचमा कञ्चनपुर निर्वाचन क्षेत्र नम्बर ३ मा चुनावी तालमेल भएको व्यहोरा सबैलाई सर्वविदितै छ,’ विज्ञप्तिमा उल्लेख छ, ‘तालमेलअनुसार आ–आफ्नो ठाउँमा प्रत्यक्षतर्फ प्रतिनिधिसभा सदस्य पदमा क. निरुदेवी पाललाई सूर्य चिह्नमा र प्रदेशसभा सदस्य पदमा निर्वाचन क्षेत्र नम्बर ३(१) अर्थात ३(क)मा राप्रपाका धर्मराज जोशीको चुनाव चिह्न हलो र निर्वाचन क्षेत्र नम्बर ३(२) अर्थात् ३(ख) मा क. सुरेन्द्र विष्टलाई सूर्य चिह्नमा मतदान गराउन दुवै पार्टीका नेता कार्याकर्ताहरूलाई हार्दिक अनुरोध गर्दछौं ।’

सत्ता गठबन्धनको नाममा मुलुकलाई अस्थितरतातर्फ धकेल्ने काम भइरहेको एमालेको आरोप छ । ‘सीमित व्यक्तिहरूको निहित स्वार्थ पूरा हुन नदिन र राजनीतिक स्थिरता कायम गर्दै समृद्ध नेपाल, सुखी नेपालीको राष्ट्रिय आकांक्षालाई पूरा गर्न सम्पूर्ण दिदीबहिनी तथा दाजुभाइहरूको हामीलाई साथ सहयोग प्राप्त हुनेछ र हाम्रा उम्मेदवारहरूलाई विजयी गराउनुहुनेछ भन्ने पूर्ण विश्वास व्यक्त गरेका छौं,’ विज्ञप्तिमा छ ।