भीमदत्त नगरपालिकाका मेयर र उपमेयर फोटो सेशनमै नगरमा बेथितिको चाङ, नागरिक हैरान

महेन्द्रनगर:
कञ्चनपुरको सदरमुकाम भीमदत्त नगरपालिकाका मेयर पदम बोगटी र उपमेयर निलम लेखक सहभागी कार्यक्रमका तस्वीर सामाजिक सञ्जालमा देख्न पाइन्छ ।

कहिले घाँस काट्न जंगलतिर परेको देखिन्छ भने कहिले होटलका सुविधा सम्पन्न सभाहलमा बैठक गरिरहेका देखिन्छन् । मेयर, उपमेयरको औपचारिक सक्रियताबीच नगरपालिकाको मुटु भीमदत्त बजार क्षेत्रमै थुप्रै विकृति देखिने गरेका छन् ।

अर्बाैंको ऋण लगानीमा निर्माणाधीन शहरी विकास परियोजनाको सडक पूर्वाधार होस् वा नगरभित्रको आन्तरिक प्रशासन, जताततै बेथितिको चाङ देखिन्छ । जनस्तरमा छताछुल्ल भइसकेका यस्ता बेथितिको समाधानमा मेयर, उपमेयरले प्रभावकारी नतिजा देखाउन सकेका छैनन्, बरु कर्मकाण्डी अनुगमन, छलफल र अन्तक्रिया गरेको देखिन्छ ।

महेन्द्रनगर बजार क्षेत्रका स्थानीय भुवन धामी ले मेयर, उपमेयरले काम गरेर देखाउन नसकेको गुनासो गरे । ‘हाम्रा मेयर, उपमेयरको अनुगमनको नौटंकी खुबै देखिन्छ ।

तर ठेकेदारले मनपरी रूपमा गुणस्तरहीन काम गरिरहेको छ, नगरपालिकाले बेथिति रोक्न सकेको छैन् । कतै मिलेमतो त छैन ?’ उनले प्रश्न गरे ।

हामीले सुदार गर्न भनेका छाैं, गुनासो आउँछ गुनासो सुन्नु पर्ने हाम्रो दायित्व हो । भीमदत्त नगरपालिकाका नगर प्रवक्ता महेन्द्र खड्काले बताए ।

नगर क्षेत्रमा हुने विकासमाथि पटक–पटक प्रश्न उठ्ने गरेको छ । तैपनि मेयर बोगटीले कुनै प्रभावकारी सक्रियता देखाउन सकेका छैनन् । मेयर बोगटी नेतृत्वमा आएपछि कुनै रचनात्मक योजना र कार्यक्रम पनि लागू गर्न सकेका छैनन् ।

पुरानै योजना र कार्यक्रम पनि बोगटीको नेतृत्वमा विवादित बनिरहेका छन् । नगरपालिकाको बेथितिबारे सञ्चारमाध्यमले प्रश्न गर्दा मेयर बोगटी जवाफ नदिई भाग्ने गरेका छन् ।