बेलडाँडीमा १५ सैयाको अस्पताल निर्माण हुँदै

बेलडाँडी,
कञ्चनपुरको दक्षिणी क्षेत्र बेलडाँडी गाँउपालिकामा १५ सैयाको अस्पताल निर्माण भईरहेको छ ।

गाँउपालिका २ बेलडाँडी बजार नजिकै अस्पताल निर्माण भईरहेको छ । ०७७ सालमा सरकारले देशभरीका ३ सय ९६ पालिकामा १५ सैयाका आधारभूत अस्पताल बनाउने योजना अनुरुप बेलडाँडी स्थानीय सरकारले अस्पताल निर्माण कार्य चालु आर्थिक बर्ष ०७९/०८०देखि शुरु गरेको हो ।

तत्तकालिन प्रधानमन्त्री केपी शर्मा ओलीले १७मंसिर ०७७सालमा एकसाथ अस्पताल नभएका पालिकामा अस्पताल निर्माणका लागि एकसाथ शिलान्यास गरेका थिए ।

तर, बेलडाँडीमा तत्तकालिन एमाले नेतृत्वकै स्थानीय सरकारले अस्पताल निर्माण कार्य अघि नबढाएपछि काँग्रेस नेतृत्वको स्थानीय सरकारका पालामा अस्पताल निर्माण कार्य अघि बढेको छ ।

अस्पताल शिलान्यासपछि तीन बर्ष ०७९ बैशाखसम्ममा एमाले नेता धन बहादुर थापा(नेतृत्वको स्थानीय सरकार रहेको थियो । उक्त सरकारका पालामा अस्पताल निर्माण अघि अघि नबढेपछि ०७९ जेठ पहिलो सातादेखि काँग्रेस नेता हरिचन्द्र राना नेतृत्वको स्थानीय सरकारले अस्पताल निर्माण कार्य अघि बढाएपछि अस्पताल निर्माण कार्य अघि बढेको हो ।

राना नेतृत्वको बेलडाँडी स्थानीय सरकार गठन भएको सात महिनापछि अस्पताल निर्माण कार्य अघि बढेको पाईन्छ । १५ बेडको अस्पताल निर्माणका लागि बङगामुखी बैजनाथ जेभीले ६ मसिर ०७९मा सम्झौता गरेको छ ।

दुई बर्षभित्रै अस्पताल निर्माण गरिसक्ने गरी निर्माण कम्पनी बङलामुखी बैजनाथ भेजीले पालिकासंग सम्झौता गरेको छ । १६ करोड, ५१ लाख, ६२ हजार,५७७ रुपैयामा आगामी ६ मंसिर ०८१मा निर्माण कार्य सक्ने सम्झौता गरेको छ ।

बेलडाँडी गाँउपालिका प्रवक्ता गज बहादुर विष्टले सम्झौतापछि पुषदेखि निर्माण कार्य शुरु गरेको बताए । प्रवक्ता विष्टका अनुसार शुक्रबार एक कार्यक्रमका विच सुदूरपश्चिम प्रदेश सभा सदस्य दिवान सिह विष्टले अस्पतालको शिलान्यास गरेका छन ।

अस्पताल शिलान्यास गर्दै विष्टले समयमै गुणस्तरिय भवन निर्माण गर्न निर्माण व्यवसायीलाई आग्रह गरेका छन । प्रदेश सभा सदस्य विष्टले संविधान अनुरुप स्वास्थ्य अधिकार जनताको मौलिक अधिकार भएकाले भवन निर्माणसंगै अस्पताल संचालनका लागि आफ्नो तर्फबाट पहल गर्ने बताए ।

बेलडाँडी गाँउपालिका प्रमुख हरिशचन्द्र रानाले अस्पताल निर्माण कार्य तिव्र गतिमा अघि बढाउनुपर्नेमा जोडदिए । गाँउप्रमुख रानाले अस्पताल निर्माणमा पालिकाबाट पुर्ण सहयोग रहनेछ । यस अघि बेलडाँडीमा प्राथमिक स्वास्थ्य केन्द्र मार्फत आधारभूत स्वास्थ्य सेवा प्रदान भईरहेको छ ।

अस्पताल निर्माण भएसंगै बेलडाँडीका स्थानीय जनता गाँउमै विशेषज्ञ स्वास्थ्य सेवा पाउने गाँउप्रमुख रानाको भनाई छ । अस्पताल निर्माण हुन थालेपछि स्थानीय समेत हर्षित भएका छन ।