लालझाडी प्रमुख रानाद्वारा दोदा नदिमा भईरहेको जनताको तटबन्ध कार्यको अनुगमन, समयमै काम सम्पन्न हुनेमा अाशावादी

लालझाडी,
लालझाडी गाउँपालिका प्रमुख निर्मल रानाद्वारा दोदा नदिमा भईरहेको जनताको तटबन्ध कार्यको अनुगमन गरिएको छ ।

पुस २३ गते देखि शुरू गरिएको कञ्चनपुरको दोदा नदीको तटबन्ध निर्माण कार्यको पालिका अध्यक्ष रानाले अनुगमन गरेका छन् । कटानीको उच्च जोखिममा रहेको दोदा नदीमा तटबन्ध निर्माण कार्य भईरहेको छ ।

चुरे भएर दक्षिण बग्ने दोदा नदीले हरेक बर्षातका बेला लालझाडी गाँउपालिकामा बढि क्षति पु¥याउँदै आएको थियो । बर्षातका बेला दोदा नदीको उच्च कटानी प्रभावित क्षेत्रमा तटबन्ध निर्माण गर्न लागिएको हो ।

दोदा नदीले सबैभन्दा बढि लालझाडी क्षेत्रमा विपद् जोखिम निम्तिन थालेपछि उच्च प्राथमिकताका साथ तटबन्ध निर्माण कार्य भईरहेको छ । जनताको तटबन्ध कार्यक्रम फिल्ड कार्यालय ७ कञ्चनपुरले चालु आर्थिक बर्ष २०७९/०८० मा दोदा नदीमा ११ सय २० मिटर लम्बाई र ५ मिटर जति उचाईको तटबन्ध निर्माण गर्न लागेको छ ।

अध्यक्ष रानाका अनुसार प्रसंसा, भागेश्वर जेभीले ११ सय २० मिटर तटबन्ध निर्माणको कार्य गरिरहेको बताए । ५ करोड ९१ लाख लागतमा तटबन्ध निर्माणका लागि एक बर्षको समयसीमा दिईएको छ सो अनुसार काम सन्तोषजनक भएको जनाए । तटबन्ध निर्माण भएसंगै लालझाडीको उर्बराभूमि कटानीबाट जोगिने र जसबाट किसान प्रत्यक्ष लाभान्वित हुने अध्यक्ष रानाको भनाई छ ।

कटानीबाट प्रभावित भएका जनता समेत तटबन्ध निर्माण हुन थालेपछि उत्साहित भएका छन ।

लालझाडीका युवा समाजसेवी तथा  नेता अमर सिह रानाले विगतदेखिको बारम्बार पहल र गत स्थानीय तहमा चुनावका बेला जनतासंग गरेका बाचा अनुरुप तटबन्धको काम सन्तोषजनक तरिकाले अघि बढेको बताए ।

उहाँका अनुसार अहिले निर्माण हुने तटबन्धले सयौँ किसानको जमिन कटानी र दर्जनौँ स्थानीय डुवानबाट सुरक्षित हुने बताए । बाँकी नदी नियन्त्रणका लागि समेत सरकारी निकायहरूमा पहल भएको जनाए ।