सीमा विवाद तत्काल समाधान गर्न सरकारसँग सांसद तामाङकाे माग

काठमाण्डाैं,
नेकपा एमालेका सांसद तारा लामाले कञ्चनपुरको भारतसँगको सीमा विवाद समाधान गर्न सरकारसँग आग्रह गरेका छन् ।

आइबार प्रतिनिधिसभाको बैठकमा बोल्दै सांसद लामाले भारतसँगको सीमा विवादका कारण कञ्चनपुरका नागरिकले वर्षौदेखि सास्ती बेहोर्दै आएको बताउँदै तत्काल समाधान गर्न सरकारको ध्यानाकर्षण गराएका हुन् । उनले संसदमा सिमानामा भारतीय सुरक्षाकर्मीले नेपाली नागरिक र कर्मचारीहरुमाथि ज्यादती गरिरहेको घटना सुनाए ।

‘कञ्चनपुरको बेलौरी नगरपालिका क्षेत्रमा विद्युत् लाइन विस्तार गर्ने क्रममा नेपाल विद्युत् प्राधिकरणका कर्मचारीलाई भारतीय सुरक्षाकर्मीले धाकधम्की गरेका छन् । कहिले हुलाकी सडक बनाउँदा अवरोध गरिएको छ, कहिले विद्युत् विस्तारमा अवरोध गरिएको छ । सीमा क्षेत्रमा नेपाली नागरिकहरूले असुरक्षित महसुस गरिरहेका छन् ।

जनतालाई सुरक्षाको अनुभूति हुने गरी सीमा विवादको समाधान खोजियोस् ।’

त्यसैगरी उनले सीमा क्षेत्रमा भारतीय सुरक्षाकर्मीको ज्यादतीको भर्त्सना गर्न समेत माग गरेका छन् । ‘२०७३ फागुन २६ गते गोविन्द गौतमले सहादत प्राप्त गरेको जस्तो त्यहाँको जनताले फेरि भोग्नु नपरोस्,’ लामाले भने ।

यसभन्दा अघि बेलौरीमा नेपाली भूमिमा बनेको सडक विस्तारमा भारतीय सशस्त्र सीमा सुरक्षा बल (एसएसबी)ले अवरोध गरेको थियो । बेलौरी नगरपालिकाले वडा नम्बर १० सरघाट क्षेत्रमा सडक विस्तार थालेको थियो । पुरानो सडकलाई नगरपालिकाले ग्राभेलका लागि ८ लाख बजेट छुट्याएको छ । तर, ३३ नम्बरदेखि ३६ नम्बर पिल्लर क्षेत्रमा सडक विस्तारमा भारतीय पक्षले अवरोध गरेको थियो ।