यस बर्ष समयमै पाठ्यपुस्तक विद्यार्थीको हातमा

कञ्चनपुर,
यस बर्ष विद्यार्थीले समयमै पाठ्यपुस्तक पाउने भएका छन ।

विगतका बर्षहरुमा शैक्षिकसत्र शुरु भएको ६ महिनासम्म पनि पुस्तक नपुग्ने समस्या थियो, यस पटक सरकारले ताकेता गरेसंगै समयमै पाठ्यपुस्तक विद्यार्थीको हातमा पुगेको छ ।

नयाँ शैक्षिक सत्र २०८० सुरु भएसँगै देशभरका ५९ जिल्लाका विद्यालयमा पाठ्यपुस्तक पुगेको छ । गत चैत २४ गतेदेखि वैशाख ३ गतेसम्म देशभरका ५९ जिल्लाका विद्यालयमा पाठ्यपुस्तक पुगेको जनक शिक्षा सामग्री केन्द्रले जनाएको छ ।

प्रधानमन्त्री तथा मन्त्रिपरिषद्को कार्यालयले केन्द्रमा अनुगमन गरेको छ । सोमबार पाठ्यपुस्तक बिक्री–वितरण र छपाइको विषयमा अनुमन गरेको हो ।

अनुगमन पश्चात केन्द्रका प्रबन्धक अनिलकुमार झाले नयाँ शैक्षिक सत्रमा सबै विद्यार्थीको हातमा पाठ्यपुस्तक र्पुयाउने गरी काम भइरहेको बताए। उनले अहिलेसम्म ५९ जिल्लाका प्रत्येक विद्यालयमा पाठ्यपुस्तक पुगेको बताए । उनका अनुसार केन्द्रले कक्षा ६ देखि कक्षा १० सम्मका १ करोड ५० लाख पाठ्यपुस्तक छपाईको काम सम्पन्न गरी बिक्री–वितरण गरिरहेको छ ।

केही स्थानमा ढुवानीको क्रममा रहेकाले तीन दिनभित्र पुस्तक पुगिसक्ने स्पष्ट पार्दै उनले बाँकी १८ जिल्लामा वैशाख १५ सम्म पुस्तक पुग्ने बताए । पुस्तक छपाइ गर्ने मेसिन, जनशक्ति, बजेट र कच्चा पदार्थको व्यवस्थापन समयमा नै गर्न सकेकाले यो वर्ष विद्यालय सञ्चालन हुनुभन्दा पहिले नै विद्यालयमा पुस्तक र्पुयाउन सफल भएको झाको भनाइ छ ।

‘मेसिनको संख्या दुई थियो, तीन थप्दा पाँचवटा भयो ।
८० हजार प्रतिदिन छपाइ क्षमता भएकोमा मेसिन थपिएसँगै प्रतिदिन दुई लाख ४० हजार छपाइ गर्ने क्षमतामा पुगेका छौँ ।

‘कागज खरिदमा समस्या नहुँदा पुसपछि निरन्तर रूपमा मेसिन सञ्चालन गरिरहेका छौँ, ‘ उनले भने, ‘प्रधानमन्त्री कार्यालयबाट भएको सहयोगले पनि थप सहज भयो ।’

विद्यार्थीले समयमै पाठ्यपुस्तक पाउने भएपछि हर्षित भएका छन । यस बर्ष समयमै पाठ्यपुस्तक विद्यार्थीको हातमा पुगेपछि अभिभावक समेत सन्तुष्टी भएका छन ।