बरिष्ठ उद्योगपति अाेम प्रकाश अग्रवालद्धारा एसओएसमा १० लाखको एसी सहयोग

कैलाली:

धनगढीको गेटास्थित एसओएस बालग्राममा एक महिनाअघि आयोजित ३७ औं अन्तर्राष्ट्रिय एसओएस दिवसमा प्रमुख अतिथि थिए, सुदूर पश्चिम प्रदेश सरकारका सामाजिक विकास मन्त्री । र, अतिथि थिए, बरिष्ठ उद्योगपति ओम प्रकाश अग्रवाल ।

स्वास्थ्यले साथ दिएसम्म एसओएस बालग्रामका हरेक कार्यक्रममा सहभागी हुदै आएका अग्रवाल त्यस कार्यक्रममा पनि समयमै पुगेका थिए । भव्य रुपमा मनाईएको बार्षिकोत्सव समारोहमा अग्रवालले एउटा कुराको भने त्यहाँ कमि महशुस गरेका थिए ।

सभा हलमा एसी लागेकाे थिएन । उनले समारोहको समापनपछि एसओएसका योजना निर्देशक पदम हमालसंग जिज्ञासा राख्दै भनेल–हलमा किन एसी छैन । हमालले जवाफ दिए–आर्थिक अभावका कारण एसी राख्न सकेका छैनौ । अग्रवालको जिज्ञासा त्यतिमै शान्त भएन, उनले फेरि सोधे–कति वटा एसी भए पुग्छ ? हमालले भने,–प्राबिधिकसंग सल्लाह गरेर भन्न सक्छु । अग्रवालले भनेफ त्यसो भए प्राबिधिकसंग सल्लाह गरेर भन्नुहोला । आवश्यक परेजति एसीको खर्च म व्यहोर्नेछु ।

प्राबिधिकको सल्लाहपछि केही दिनअघि हमालले अग्रवाललाई सभा हलमा ६ वटा एसी लाग्ने जानकारी गराय । अग्रवालले तत्काल एसी अर्डर गरे । र, बिलम्ब नगरी बिहीवार १० लाख रुपैया बराबरका ६ वटा एसी एसओएसमा पठाए । एसओएसका योजना निर्देशक हमालले बरिष्ठ उद्योगपति अग्रवालले बिगतमा समेत पटक पटक सहयोग गरेको र यस पटक ६ वटा एसी सहयोग स्वरुप प्रदान गरेको बताए ।

हमालले एसओएसमा निरन्तर रुपमा सहयोग गर्दै आएका अग्रवाल प्रति आभार व्यक्त गरे । बरिष्ठ उद्योगपति अग्रवालले यसअघि पनि थुप्रै सामाजिक कार्यमा सहयोग गरेका हुन ।

केही समय अघि रोटरी क्लव अफ धनगढीद्धारा कैलालीको गोदावरीमा निर्मित खानेपानी आयोजनाका लागि १० लाख रुपैया सहयोग गरेकोमा अग्रवाललाई सम्मान पनि गरिएको थियो । अग्रवालले खानेपानी आयोजनाका लागि आवश्यक पर्ने जनरेटर खरीदमा समेत सहयोग गर्ने बचन दिएका छन् ।