बेलाैरी ८ पचुइका युवाको डेङ्गीका कारण अकालमै गयो ज्यान

बेलौरी,१२ भदौ । कञ्चनपुरको बेलौरीमा डेङ्गु रोग संक्रमणका कारण एक युवाको ज्यान गएको छ ।

बेलौरी नगरपालिका-८ पचुइ स्कुल टोल बस्ने बर्ष २८ का हिक्मत खत्रीको डेङ्गुको संक्रमित भई ज्यान गएको पारिवारिक स्रोतले जनाएको छ ।

अत्यधिक ज्वरो आएपछि धनगढी नोभा अस्पताल लगिएका खत्रीको उपचारकै क्रममा गएराति मृत्यु भएको जनाईएको छ । खत्रीका एक श्रीमती र दुई छोरा रहेका छन् । उनी बेलाबेलामा भारतमा गई रोजगारी गर्दै आएका थिए ।

उनी एक हप्ता अगाडि मात्रै घर फर्किएका थिए । भारतबाटै डेङ्गी संक्रमित भए वा घर फर्किएपछि भन्ने विषयमा खुल्न नसकेको सोही ठाउँ बस्ने तीर्थराज बोहराको भनाइ छ ।

उक्त क्षेत्रमा तत्काल डेङ्गी रोग नियन्त्रणको लागि लामखुट्टेका फुल नष्ट गर्न स्प्रे गरी सहयोग गरिदिन स्थानीय सरकारलाई अनुरोध गरिएको छ । सो क्षेत्रका युवाहरू सरसफाइ र जनचेतना अभिवृद्धिमा पनि लागेका छन् ।

उक्त घटनालाई गम्भीर रूपमा लिई सबैले सतर्कता अपनाउनु पर्ने बेलौरी नगरपालिकाका कम्प्युटर अपरेटर अशोक पाण्डेयको भनाइ रहेको छ ।