राष्ट्रपति रनिङशिल्ड प्रतियोगिता २०८१ पुनर्वासमा सुरु

लालबहादुर एसके, पौष ०५ पुनर्वास – कञ्चनपुर जिल्लाको पुनर्वास नगरपालिकामा स्थानीय तह स्तरीय पाँचौं राष्ट्रपति रनिङशिल्ड प्रतियोगिता २०८१ गौरीशंकर माध्यमिक विद्यालय पुनर्वासमा भव्य रूपमा सुरु भएको छ।
शुक्रबार भएको उद्घाटन समारोह नगरप्रमुख तोय प्रसाद शर्माको सभापतित्वमा र संघीय सांसद तारा लामा तामाङको प्रमुख आतिथ्यमा सम्पन्न भएको छ।

कार्यक्रमको उद्घाटन गर्दै प्रमुख अतिथि संघीय सांसद तारा लामा तामाङले भन्नुभयो,”यस्ता प्रतियोगिताले विद्यार्थीहरूलाई खेलकुदको माध्यमबाट अनुशासन, समर्पण र नेतृत्व क्षमता विकास गर्न सहयोग पुर्‍याउँछ। यो कार्यक्रमले नयाँ प्रतिभाहरूलाई उजागर गर्नेछ।”

नगरप्रमुख तोय प्रसाद शर्माले कार्यक्रमको सभापतित्व गर्दै खेलकुदले शारीरिक र मानसिक विकासमा पर्ने सकारात्मक प्रभावबारे चर्चा गर्दै भन्नुभयो,”राष्ट्रपति रनिङशिल्ड प्रतियोगिता हाम्रो नगरका विद्यार्थीहरूको भविष्य उज्ज्वल बनाउन मार्गप्रशस्त गर्नेछ।”

गौरीशंकर विद्यालय व्यवस्थापन समितिका अध्यक्ष पदमबहादुर पुजाराको नेतृत्वमा प्रतियोगिताको व्यवस्थापन भव्य रूपमा गरिएको छ। उहाँले विद्यार्थीहरूलाई प्रेरणा र अवसर प्रदान गर्न यस्ता कार्यक्रमहरूको महत्त्वलाई जोड दिनुभयो।

कार्यक्रम सञ्चालनको जिम्मेवारी गौरीशंकर माविका शिक्षक लोकबहादुर थापाले लिनुभएको थियो, जसले कार्यक्रमलाई समयमै र सुचारु रूपमा संचालन गर्न महत्त्वपूर्ण भूमिका खेले।

उद्घाटन सत्रमा पाँच विधामा प्रतिस्पर्धा गरियो, जसमा मार्च पास, ८०० मिटर दौड (छात्र/छात्रा), र सटपुट थ्रो (छात्र/छात्रा) प्रमुख थिए। कार्यक्रममा २६ विद्यालयका विद्यार्थीहरूको उत्साहजनक सहभागिता देखिएको थियो।

पुनर्वास नगरपालिकाका शिक्षा शाखा प्रमुख शिवराज भट्टले स्वागत मन्तव्य राख्दै कार्यक्रमलाई सफल बनाउन सहयोग गर्ने सबैलाई धन्यवाद दिनुभयो। प्रतियोगिता आगामी दिनसम्म जारी रहनेछ।