बेलडाँडी । अल स्टार युवा क्लबको आयोजनामा सञ्चालित ९औँ संस्करण बेलडाँडी खुला फुटबल प्रतियोगिता-२०८३ को उपाधि बेलडाँडी फुटबल एकेडेमी ‘बी’ ले हात पारेको छ।
भाद्र १४ गतेदेखि २१ गतेसम्म सञ्चालन भएको प्रतियोगिताको फाइनल खेलमा बेलडाँडी फुटबल एकेडेमी ‘बी’ ले ओजी ग्रुप, बेलडाँडी गाउँपालिका-१ लाई ३-० गोलको फराकिलो अन्तरले पराजित गर्दै उपाधिमाथि कब्जा जमाएको हो।
दिउँसो १२ बजेदेखि सञ्चालन हुने तय भएको फाइनल खेल भारी वर्षाका कारण प्रभावित बनेको थियो। निरन्तर वर्षाका कारण निर्धारित समयमा खेल सुरु हुन नसकेपछि करिब ४ बजेदेखि फाइनल खेल सुरु गरिएको थियो। प्रतिकूल मौसमका बाबजुद दुवै टोलीले उत्कृष्ट खेल प्रदर्शन गर्दै दर्शकलाई रोमाञ्चक खेलको अनुभूति गराएका थिए।
झरीका बीच पनि खेलप्रेमी दर्शकहरूको उत्साह भने कम भएन। छाता ओढेरै ठूलो संख्यामा दर्शकहरू मैदानमा उपस्थित भई फाइनल खेलको आनन्द लिइरहेका थिए। वर्षाका कारण मैदानसम्म पुग्न नसकेका खेलप्रेमीहरूले भने अल स्टार युवा क्लबको फेसबुक लाइभमार्फत घरमै बसेर खेलको प्रत्यक्ष प्रसारण हेरेका थिए।
प्रतियोगितामा उत्कृष्ट प्रदर्शन गर्दै फाइनलसम्म पुगेका दुवै टोली उपाधि जित्ने लक्ष्यका साथ मैदानमा उत्रिएका थिए। तर, निर्णायक खेलमा उत्कृष्ट प्रदर्शन गरेको बेलडाँडी फुटबल एकेडेमी ‘बी’ ले तीन गोल गर्दै ओजी ग्रुपमाथि स्पष्ट जित निकाल्न सफल भयो।
समापन समारोहमा बेलडाँडी गाउँपालिका प्रमुख हरिशचन्द्र राना प्रमुख अतिथिका रूपमा उपस्थित रहेका थिए। विजेता तथा उपविजेता टोलीलाई पुरस्कार वितरण गरिएको आयोजकले जनाएको छ।
प्रतियोगिताको विजेता बेलडाँडी फुटबल एकेडेमी ‘बी’ ले ८३ हजार रुपैयाँ नगदसहित ट्रफी, प्रमाणपत्र र मेडल प्राप्त गरेको छ भने उपविजेता ओजी ग्रुप, बेलडाँडी गाउँपालिका-१ ले ४५ हजार रुपैयाँ नगदसहित ट्रफी, प्रमाणपत्र र मेडल प्राप्त गरेको छ। प्रतियोगितामा उत्कृष्ट खेलाडी तथा विभिन्न विधामा उत्कृष्ट प्रदर्शन गर्ने खेलाडीहरूलाई समेत पुरस्कार प्रदान गर्ने व्यवस्था गरिएको थियो।
२३ टोलीको सहभागिता रहेको प्रतियोगिताका खेलहरू एन्फा रेफ्री मानबहादुर तामाङ, राम राना, गणेश रोकाया र दीपेन्द्र धामी ले सञ्चालन गरेका थिए।
झरी र प्रतिकूल मौसमलाई समेत चुनौती दिँदै सम्पन्न भएको प्रतियोगिताको फाइनलमा उत्कृष्ट प्रदर्शन गर्दै बेलडाँडी फुटबल एकेडेमी ‘बी’ ले उपाधि उचाल्नु बेलडाँडीको फुटबल इतिहासमा अर्को उत्साहपूर्ण क्षण बनेको छ।
Discussion about this post