लालझाडीमा नागरिकसंग गाउँपालिका अध्यक्ष कार्यक्रम लागू

बेलडाँडी,
लालझाडी गाउँपालिकामा ‘नागरिकसंग गाउँपालिका अध्यक्ष’ स्वास्थ्य विशेष कार्यक्रम लागू भएको छ ।

लालझाडी वासीको स्वास्थ्यलाई मध्यनजर गर्दै यो कार्यक्रम लागू गरिएको पालिकाले जनाएको छ ।

गाउँबासीहरूको स्वास्थ्य अवस्थाबारे बुझ्न र रोगको पहिचान गरी उपचार योजना बनाउन गाउँपालिकाले ‘नागरिकसंग गाउँपालिका अध्यक्ष’ स्वास्थ्य विशेष कार्यक्रमको सुरुवात गरेको लालझाडी गाउँपालिकाका अध्यक्ष निर्मल रानाले जानकारी गराउनु भयो ।

आइतबार शुभारम्भ गरिएको ‘नागरिकसंग गाउँपालिका अध्यक्ष’ स्वास्थ्य विशेष कार्यक्रम अन्तर्गत अब सबै वडाहरूमा नागरिकको घर दैलोमै गई सेवा प्रवाह गरिने पालिका स्वास्थ्य शाखाका संयोजक खगेन्द्र चौधरीले बताउनु भयो ।

कार्यक्रमबाट लक्षित वर्गका नागरिकसम्म स्वास्थ्य सेवा सहज तरिकाले पु¥याउने उद्देश्यकासाथ उच्च रक्तचाप, मधुमेह लगायतका बिरामीको समस्या पहिचान, महिलाको आङ खस्ने समस्या, मिर्गौला पीडित, क्यान्सर र अन्य दीर्घ रोगी लगायतको खोज पड्ताल गरी जानकारी लिने र उपचार योजना बनाइने संयोजक चौधरीले बताउनु भएको छ ।

स्वास्थ्यकर्मी सहितको टोली घर दैलोमा गई स्वास्थ्य चेकजाँच र आवश्यक परामर्शमा केन्द्रित हुने बताइएको छ ।

शुभारम्भका क्रममा कार्यक्रममा सहभागीहरूको उच्च रक्तचाप र मधुमेहका लागि रगत जाँच गरिएको थियो ।

कार्यक्रममा लालझाडी गाउँपालिकाका अध्यक्ष निर्मल राना, उपाध्यक्ष सपना चौधरी राना, वडा अध्यक्षहरू, प्रमुख प्रशासकीय अधिकृत लक्ष्मी दत्त भट्ट लगायतका कर्मचारी, स्वास्थ्यकर्मीहरू र सञ्चारकर्मीहरूको सहभागिता रहेको थियोे ।