दोधारा ड्युटीमा रहेका बिअोपी प्रमुम माथी अराजक समुहद्वारा खुकुरी प्रहार

दोधारा,
कञ्चनपुरको दोधाराचाँदनी ड्युटीमा रहेका सशस्त्र प्रहरी बल नेपालका सई माथि खुकुरी प्रहार भएको छ ।

गए राति दोधाराचाँदनी नगरपालिका वडा नम्बर ७ कन्चनभोजमा ड्युटीमा रहेका कञ्चनभोज बिओपीका प्रमुख सशस्त्र प्रहरी नायव निरीक्षक नरेन्द्र चैसिरमाथि अराजक समुहले खुकुरी प्रहार गरेको हो ।

राति करिब १० बजेपछिको समयमा झोलुङ्गे पुलमा बसिरहेका युवाहरूलाई राति राति यसरी घुमफिर नगर्न र आआफ्नो घर जान भनेको सशस्त्र प्रहरीको गस्ती टोलीलाई त्यो समुहले खुकुरी प्रहार गरेको सशस्त्र प्रहरीले जनाएको छ ।
राति नघुम्न अाग्रह गरेको गस्ती टोली अलि पर पुग्दा सोही समुहका एक जना रोहन बयकले खुकुरी प्रहार गरेको जनाईएको छ ।

सशस्त्र प्रहरीका सई नरेन्द्र चैसिरको हातमा चोट लागेको छ भने आक्रमणकारी गिरोह फरार रहेको बताइएको छ । नेपाल प्रहरी समेतको सहयोगमा आक्रमणकारीको खोजी गरी कानुन बमोजिम कारबाही प्रक्रिया अगाडि बढाइने सशस्त्र प्रहरीले जनाएको छ ।

उक्त क्षेत्रमा लागू औषध ओसारपसार र चोरी तस्करी नियन्त्रणका लागि खटिएको सुरक्षा निकायमाथि बेलाबेलामा प्रहार हुने गरेको छ ।